Hvað viltu láta gera? Reisa og reka samfélagsgróðurhús við hvern einasta leikskóla. Þar munu börnin okkar leika sér að því að planta og rækta grænmeti, krydd og ávexti og þróa til þeirra jákvætt viðhorf. Til lengri tíma litið munu húsin víkka sýn fólks á það hvað er hægt að rækta hér á landi með einföldu skjóli fyrir veðri og vindum og viðbótarljósi í svartasta skammdeginu. Samfélagsgróðurhúsin skulum við hugsa frá grunni sem fallega, örugga og umhverfisvæna heildarlausn til framtíðar. Nota algjörlega vistvæn efni. Grind úr sérstaklega meðhöndluðum viði sem gerir hann níðsterkan og ónæman fyrir myglu. Nýstárlegar rúður úr glærðu tré sem er margfalt léttara, sterkara og öruggara efni en gler, því ef það gefur eftir rifnar það í hættulausa strimla í stað þess að brotna. Húsin hitum við með ókeypis affallsvatni og lýsum með sparneytnum LED gróðurhúsaljósum. Vefsíða og app samfélagsgróðurhúsanna verða miðstöðvar fræðslu og samskipta sem og viðhalds- og pöntunargátt leikskólanna (sjá viðhengi) t.d. fyrir hús, fræ og smáplöntur. Einfalt en hátæknilegt kerfi sem líka heldur utan um net garðyrkjufræðinga og gerir skólunum kleift að njóta þjónustu þeirra, s.s. ráðgjöf um ræktunina og vitja hennar öðru hverju þannig að hún dafni áfallalaust. Heildarlausn til framtíðar. Leyfum okkar að skyggnast inn í mögulega framtíð. Sjáðu barnið þitt fyrir sér í eltingaleik við vini sína í leikskólanum. Þau hlaupa hlæjandi inn í blómlegt gróðurhús og grípa með sér safaríkt epli af tré sem þau plöntuðu sjálf. Í hádeginu sendast þau nokkur saman fyrir kokkinn út í gróðurhús eftir handfylli af ferskri myntu til að hafa út á súpuna. Hversu miklu mundi það breyta fyrir þjóðfélagið ef hvert einasta barn hefði aðgang að gróðurhúsi fimm daga vikunnar árum saman á einu mesta mótunarskeiði lífsins? Þessi framtíð er bæði fullkomlega framkvæmanleg og innan seilingar. Hvers vegna viltu láta gera það? Íslendingar á öllum aldri neyta að meðaltali allt of lítils grænmetis og ávaxta. Innflutningur á þessari hollustu er dýr og mengandi miðað við íslenska framleiðslu. Þeir sem eiga gróðurhús, kynnast af eigin raun muninum á fersku og innfluttu grænmeti og ávöxtum. Bein tenging er á milli þess að rækta grænmeti og velja að versla ferskt, íslenskt grænmeti. Hver kannast ekki við að kaupa innflutt grænmeti og ávexti sem oft endast varla ferðina heim í innkaupapokanum? Staðreyndin er að með landsins gæðum er hér hægt að rækta flest það sem Íslendingar neyta. Það sem þarf er að hnika til menningu og hugarfari varanlega og í rétta átt. Besta og áreiðanlegasta leiðin til þess er hreinlega að ala æsku landsins upp við þann veruleika. Við höfum nefnilega allt sem til þarf. Nægt rými á rúmgóðum leikskóla- og grunnskólalóðum fyrir smekkleg og snotur gróðurhús. Sömuleiðis í görðunum við flest heimili. Hér er ódýr og endurnýjanleg raforka. Jarðhitaaffall af hitaveitukerfum skóla, heimila og stofnana má leiða í húsin til upphitunar. Langir og bjartir sumardagar og mildir vetur draga úr sveiflum og lýsa má svartasta skammdegið með hagkvæmri LED lýsingu. Náttúrulegt skjól undir trjám og við runna hlífir húsunum fyrir vindi og moldin undir fótum okkar er næringarrík. Kunnátta í ræktun leynist víða en áratugastarf Garðyrkjuskólans á Reykjum hefur myndað tengslanet garðyrkjufræðinga um land allt. Það nánast bíður eftir því að vera virkjað. Uppfræðum komandi kynslóðir um hreina, holla og hagkvæma heimaræktun ávaxta og grænmetis. Framtíðin er björt, gómsæt, græn og safarík! Í nafni fulls gagnsæis skal tekið fram að Rúnar er framkvæmdastjóri sprotafyrirtækisins Samfélagsgróðurhús ehf. Hugmyndina þróuðu stofnendur þess í nýsköpunarhraðlinum Snjallræði 2019 á vegum Höfða friðarseturs og Nýsköpunarmiðstöðvar Íslands og með aðstoð leiðbeinanda m.a. frá MIT designX í Boston, HÍ, HR og LHÍ. Fyrirtækið hlaut Sprotastyrk Tækniþróunarsjóðs 2020 til að þróa nákvæmlega þetta verkefni og skrifaði undir samning þess efnis við RANNÍS/TÞS. Stuðningur almennings í hverfakosningum hefur ætíð verið algert aðalatriði í öllum áætlunum. Undirbúningi er lokið og nú hefur þú tækifæri til að láta rödd þína heyrast. Samfélagsgróðurhús gætu fyrir þitt tilstilli, risið við alla leikskóla borgarinnar í þínu hverfi; Brákarborg, Hof, Langholt, Laugasól, Steinahlíð og Sunnuás og standa til boða þeim sjálfstæðu leikskólum sem það kjósa. Viljirðu að samfélag okkar allra taki saman höndum og geri þennan draum að veruleika fyrir börnin okkar, þá gefðu það til kynna með atkvæði þínu og deildu kosningunni meðal vina og vandamanna.
Mæli með þessu! Mjög jákvætt fyrir börnin að sjá grænmeti vaxa og taka þátt í ræktuninni. Mold er undirstaða alls lífs á landi og lærdómsríkt fyrir börnin að handleika mold í stað sands alla daga.
Elska þessa hugmynd en myndi vilja sjá samfélagsgróðurhús í hverfinu fyrir alla. Gætuð þið í þessu félagi ekki útfært hugmyndina þannig að hvert hverfi fengi eitt svona gróðurhús þar sem efnaminni hópar fengu t.d. auðveldari aðgang að grænmeti? Það myndi bæta lýðheilsu, minnka innflutning og þar með kolefnisfótspor og tryggja fæðuöryggi. Nú er ég líka að hugsa til framtíðar, ekki bara næsta sumar. Er ekki spurning um að hugsa þetta stærra?
Frábær hugmynd. Hef alltaf fundist grænmeti gott en aldrei borðað nógu mikið af því (að mínu mati). Ef það hefði verið á leikskólanum mínum þegar ég var lítill þá hefði ég pottþétt borðað meira af því.
Frábært fyrir börnin okkar að fá tækifæri til að kynnast ræktun og fersku grænmeti! Eiginlega ferlega gaman fyrir hvern sem er að taka þátt í svona.
Dásamleg og þroskandi leið fyrir börn til að kynnast náttúrunni og sjá hlutina vaxa og dafna.
Var hægt að finna betri uppeldisaðferð en að rækta grænmeti í eigin garði og búa þannig að sínu til framtíðar
Að leggja fræ í mold vekur ævinlega gleði og tilhlökkun hjá börnumum. Að sjá eitthvað vaxa og dafna leggur grunninn að dýrmætri kunnáttu og getu til rækta allskonar grænmeti sem þau læra að er hollt og gott fyrir alla 😀 Gríðarlega skemmtileg viðbót við leik og starf í leikskólanum og gefur fjölskyldum góðar samverustundir saman í gróðurhúsum heimilana.🤗
Góð leið til að fá matvanda krakka til að borða grænmeti. Þroskandi og uppbyggilegt.
Ég hefði borðar talsvert meira grænmeti ef ég hefði upplifað það sjálfur að ræktað það sem krakki. Þetta er frábær hugmynd.
Af hverju var þetta ekki komið fyrir löngu síðan?
Dásamleg hugmynd!
Skemmtileg viðbót við annars frábæra starfsemi sem vonandi hlýtur brautargengi hjá borgaryfirvöldum.
Kæri hugmyndahöfundur, þakka þér kærlega fyrir þátttöku þína í verkefninu Hverfið mitt. Yfir 1320 mjög góðar hugmyndir bárust og öll þátttökumet voru slegin. Fagteymi sérfræðinga verkefnisins hefur lokið við yfirferð hugmynda. Hugmyndin þín er ekki tæk* til kosningar í verkefninu Hverfið mitt 2020 - 2021. Verkefni sem er áþekkt þessari hugmynd er nú þegar í gangi hjá Skóla- og frístundasviði Reykjavíkurborgar og er á tilraunastigi. Ekki er komin niðurstaða og reynsla af því verkefni og því ekki hægt að kjósa um hugmyndina að svo stöddu. Næsta skref í verkefninu er að velja þær hugmyndir sem eiga að fara á kjörseðilinn í hverju hverfi. Þetta skref fer fram á opnum aukafundum íbúaráða sem verður streymt á Facebook. Allir geta tekið þátt í þessum fundum. Þeir sem fylgjast með útsendingunni geta tekið þátt í uppstillingunni. Gaman væri að þú tækir þátt í því að vekja athygli á fundinum þegar hann verður í þínu hverfi sem og kosningunni þegar þar að kemur. Dagsetningar fundanna, hlekkir á Facebook eventa og nánari upplýsingar má finna á vefsíðunni: https://reykjavik.is/uppstilling-kjorsedla-fyrir-hverfid-mitt. *Starfsfólks verkefnisins fer yfir innsendar hugmyndir og haft er samstarf við ýmsa sérfræðinga þegar metið er hvort hugmyndir uppfylla reglur verkefnisins. Nánari upplýsingar um yfirferðarferlið: https://reykjavik.is/hverfid-mitt-god-rad-fyrir-thina-hugmynd. Kær kveðja, Eiríkur Búi Halldórsson [email protected]
This content is created by the open source Your Priorities citizen engagement platform designed by the non profit Citizens Foundation